كيبان ان هاد مفهوم ديال الدولة الاجتماعية بدا كياخد كل نهار بعد جديد أو كل واحد أو كل جهة كتعطيه المدلول اللي بغات ، لهذا باش نسهلو الشرح ديال هاد الدولة الاجتماعية ناخداوا مثال بسيط نشرحوا بيه هاد الدولة الاجتماعية .

بحال ايلا عندك مثلا مصنع فيه 100 الة و لكن غير 40 الة اللي خدامة ، اذن الانتاج ديال هاد المصنع ديما ناقص أو الربح حتى هو ديما ناقص أو المنافسة ديال هاد المصنع مع المصانع الأخرى حتى هي ديما ناقصة ، أو حتى العمال اللي خدامين في هاد المصنع ما كيتخلصوش مزيان أو ما عندهم لا حقوق لا والو ، حيث المصنع خدام بزز أو كيدخل غير شوية ديال الفلوس .

المغرب بحالو بحال هاد المصنع حتى هو عندو نفس المشكل فيه غير 42 في المئة ديال المغاربة اللي ناشطين، او يمكن ليهم يساهموا في الانتاج ديال البلاد ، أو 58 في المئة ديال المغاربة خارج نسبة النشاط ، بمعنى ما كيساهموا في حتى حاجة متعلقة بالانتاج ، هنا كيبان الدور ديال الدولة الاجتماعية ، حيث الدولة الاجتماعية، هي الدولة اللي خاصها تخلق الظروف أو الشروط اللي تخلي هاد 58 في المئة اللي خارج دائرة الانتاج يوليو حتى هوما منتجين أو قادرين يساهموا في بناء الدولة اقتصاديا و اجتماعيا و سياسيا.

الدولة الاجتماعية ماشي هي تعطي الفلوس أو تخلص في بلاصة الناس، غير من أجل انك تعطيهم فقط ، الدولة الاجتماعية هي إرادة حقيقية تشرك أكبر عدد من المغاربة في الانتاج الوطني أو تخليهم قادرين يخدمو أو قادرين يزيدو القيمة المضافة في البلاد أو ما يبقاوش عايشين غير بالمساعدات، الدولة الاجتماعية هي تخلق اقتصاد تنافسي ما فيهش الاحتكار أو الريع، اقتصاد من اجل المغاربة كاملين ماشي من اجل فئة صغيرة.

علي الغنبوري (محلل اقتصادي)